Cape Verde vs South Africa highlights: Ronwen Williams penalty saves send Bafana Bafana to Afcon 2023 semi-final

South Africa goalkeeper Ronwen Williams produce wonderful performance for penalty shootout to help South Africa defeat Cape Verde 2-1 and progress to di semi-final of di 2023 Africa Cup of Nations.

Afta di game against Cape Verde end goalless during regulation time, Williams save four of di Blue Sharks penalties to send im side through to di next round.

South Africa and Cape Verde bin struggle to get di better of each oda during regulation time but dia goalkeepers – Williams and Vozinha – bin dey in fine form.

First Williams brilliant save from Gilson Tavares shot wey im parry onto di post ensure say Bafana Bafana no lose di game inside 90 minutes.

During extra-time, Vozinha make two double saves to keep di scores goalless. First im rush out of im box to block Mayambela shot den seconds later im dive high to push out Makgopa header.

During di penalty shootout, Williams den steal di shout as im deny Bebe, Semedo, Duarte and Patrick from scoring dia kicks. Only Bryan Teixeira shot go past am into di net.

Vozinha on di oda hand bin dey able to save Modiba spotkick while Lepasa blast im kick over di bar.

But earlier successful strikes by Mvala and Mokoena ensure say South Africa and di heroics of Williams dey enough for Bafana Bafana to book dia semi-final ticket.

Wit dis victory South Africa go meet Nigeria on Wednesday for di semi-final.

Williams save Andrade shot to send Bafana Bafana into di semi-finals.

E finish 2-1 on penalties in favour of South Africa.

Now Cape Verde must score to stay in dis shootout.

Mvala place di ball on di spot and send di goalkeeper di wrong way. 1-2 in favour of South Africa.

Teixera need to score to keep Cape Verde in dis shootout. Teixera score. 1-1

Modiba na di next player to take…Vozinha save im kick wit e legs.

Duarte shot dey saved by Williams. 0-1 in favour of South Africa so far.

Lepasa to take…im don miss e kick. Still 0-1 in favour of South Africa afta two kicks.

Semedo na di next player to take…Williams save am again. 0-1 in favour of South Africa

Mokoena go go next for Bafana Bafana, im waya beta shot into di net. 0-1

Bebe step up to take di first kick…Saved by Ronwen Williams

Whoever win dis penalty shootout go meet Nigeria for di semi-final. Cape Verde na dem go take di first penalty.

AET: Cape Verde 0-0 South Africa

Into penalty shootout we go.

120 mins – Penalties na im dey wait dis two sides except dem score inside one minute of stoppage time wey di ref don add.

118 mins – Cape Verde make substitution. Rocha wey look tired don come off and Teixeria don enta di match.

117 mins – Mokoena wit anoda long range attempt. Di shot lack power and Vozinha easily catch am.

114 mins – Mashego don replace di injured Maseko.

112 mins – Substitute Thapelo Maseko don go down while im bin dey run to meet over di top pass. E be like na e hamstring e don injure. South Africa temporarily dey down to 10-men as Maseko no go fit kontinu.

109 mins – Tavares go down off di ball. Im allege say Mvala use hand block am, di ref no see anytin wrong and order play to resume

106 mins – Second half of extra-time don resume and one of dis two teams need to find di winner. Else na penalty-shootout go decide tins.

HT in extra-time: Cape Verde 0-0 South Africa

105 mins – South win cornerkick, di cross dey deep , Cape Verde clear di danger. Mvala head am back into di area but Lepasa bin dey offside. One minute of added time in extra-time.

102 mins – South Africa make two changes. Makgopa and Mugdau OFF, Lepasa and Mobbie ON

99 mins – Tavares don fire anoda shot just wide of di target. Di 22-year-old striker dey cause di South African defence all kinds of problems since im come on late in di second half.

95 mins – Tavares again wit anoda chance, dis time im drag e shot wide. South Africa players tink say im bin dey offside but di linesman flag no go up.

92 mins – Double save by Vozinha! First im spread im body well to block Mayebela header den seconds later im dive well to parry di ball out from Makgopa header.

91 mins – Just before di start of extra-time South Africa make substitution. Themba Zwane wey look tired don come off for Jayden Adams.

FT: Cape Verde 0-0 South Africa

Dis game go need thirty more minutes of extra-time to find di winner.

90+2 mins – Hit di crossbar! Gilson Tavares beat South Africa offside trap to meet a through ball. Im waya di shot first time but Williams hand touch di ball onto di crossbar and deny di striker from scoring wetin for be di winner.

90 mins – Sithole attempt from about 30 yards deflect off a defender go straight into Vozinha hands.

Five minutes, na im di ref add as added time. Dis one look like e go enta extra-time.

88 mins – From di set piece Semedo header from inside di penalty box dey too high.

87 mins – Semedo dummy modiba wey bring am down, Cape Verde now get good opportunity to create sometin.

Before dem take di freekick dem go make substitution. Cabral and Monteiro OFF, Duarte and Tavares ON.

85 mins – Soud Africa coach Hugo Broos don take off Percy Tau, Mayembela na im replace am.

80 mins – Bebe go ckose wit a freekick, di shot hit di side net.

77 mins – Play don resume and Cape Verde don threaten to score.

First Rocha shot from just outside di penalty area dey blocked den Jovane Cabral volley Monteiro cross just over di bar.

Goal don dey smell for dis match.

75 mins – Di ref don call for cooling break.

Cape Verde 0-0 South Africa

72 mins – Bebe don come on for di impressive Rodrigues.

70 mins – Rodrigues! Di winger tink say im shot dey go into di net but e hit a Mokoena. Still goalless for dis match wit 20 minutes to play.

65 mins – Now Cape Verde don make dia own changes. Mendes and Pina don go out, Semedo and Patrick don enter di match.

63 mins – Substitution for South Africa: Thapelo Maseko ON, Morena OFF.

59 mins – Gaps don dey open now for both defences as dem dey push forward to find di opening goal.

Dis time Percy Tau left-footed low cross towards Makgopa go straight into Vozinha hand. Di keeper bin collide wit Kekana but im dey okay.

56 mins – Good save by Williams! Through ball from Paulo Fernandes to Rodrigues catch di South Africa defence by surprise. Rodrigues race into di box den shoot di ball wey Williams save well.

55 mins – Cape Verde mount quick counterattack through Rodrigues wey play di ball back to Rocha. Di midfielder shot dey too high.

53 mins – South Africa put togeda neat passing di ball end up wit Makgopa wey shoot low into di arms of Vozinha.

48 mins – Di Blue Sharks threaten South Africa goal again through Monteiro cross into di area, Williams rush out of im post to catch di ball and deny Rodrigues from reaching di ball.

46 mins – Cape Verde 0-0 South Africa

South Africa resume play and stright from di restart Cape Verde collect di ball and get di first cornerkick of di second half. Di cornerkick dey wasted.

HT: Cape Verde 0-0 South Africa

45+3 mins – Percy Tau and Rocha don kwanta now for off di ball incident. Tau push di midfielder to di ground. Di ref don talk to two of dem and play don resume.

45+2 mins – Cape Verde take a short corner, Rodrigues send in a cross wey Ronwen Williams jump well to catch di ball.

45 mins – Mudau wey be right back find imsef inside di Cape Verde box, im receive Tau cut back before im scuff e shot go over.

Into three minutes of added time now.

40 mins – South Africa manage to scramble clear goalbound shot inside di area from Mendes. Cape Verde almost take di lead dia but Bafana Bafana defence stand strong.

36 mins – Cape Verde work di ball inside South Africa half, Mendes cross dey cleared but di ball fall for Kenny Rocha wey waya better shot goalwards. Di ball canon off Modiba wey bin dey down inside di box. Good move by di Blue Sharks.

34 mins – Di game don resume and South Africa clear di cornerkick away from dia goalpost.

31 mins – Mendes send in a find cross into South Africa penalty box, Williams di goalkeeper decide to watch di ball as e sail pass am but Modiba nod am out for cornerkick to dey safe.

Di ref now don signal for cooling break and Cape Verde go take dat corner later.

29 mins – Mokoena freekick hit di wall and im follow-up shot rise high into di stands.

Still… Cape Verde 0-0 South Africa.

27 mins – Ryan Mendes receive di first yellow card of di game for bringing down Mokoena. Dis fit be a good opportunity for South Africa and Mokoena wey score similar freekick against Morocco for di round of 16.

23 mins – Percy Tau win freekick in go area for South Africa afta one of di Black Sharks midfielders clip am from behind. Cape Verde deal wit di cross from di freekick well.

16 mins – Pina steal di ball from Modiba, im try to shoot di ball quickly but drag di shot wide. Di tempo of dis game dey very fast.

14 mins – South Africa race down di defence of Cape Verde, Morena feed Zwane wit a pass before di latter try to shoot from just outside di area but fail to to connect well wit di ball.

10 mins – Mokoena try im long range specialty from outside di box di goalkeeper catch am well. South Africa don respond well to Cape Verde good start to di game.

6 mins – Cape Verde look like dem don start dis game well as Costa head one setpiece ball go over.

4 mins – Ryan Mendes shoot di first shot of dis game from a tight angle down di right. Im shot wey be like cross no trouble di South African goalkeeper.

1 min – Cape Verde take di opening kick and dis quarter-final match don start.

Cape Verde XI: Vozinha; Moreira, Costa, Lopes, Paulo; Pina, Kenny Santos, Monteiro; Rodrigues, Cabral, Mendes.

South Africa XI: Williams, Mudau, Kekana, Mvala, Modiba, Mokoena, Sithole, Morena, Zwane, Tau, Makgopa.